"Ekkert í veröldinni er jafn áhrifamikið og máttur hugmyndar, sem kemur á réttum tíma". - Victor Hugo.

Það er mér mikið áhyggjuefni að íslensku nýsköpunar verðlaunin hafi hlotið ung stelpa sem hannar fatnað fyrir hunda. Hundum finnst ekki gott er vera í fötum, það er ekki í hlutarins eðli, nú eða hundarins eðli að vera í fötum. Unga stelpan tók það fram í viðtali á NFS (sem ég horfi á frá kl.14-18) að hundum á það til að verða kalt og þess vegna þurfa þeir föt, en hún hélt á litlum Chihuahua sem var klæddur í hátísku "kjól" eins og hún kallaði þetta þegar Halldór Ásgrímsson spurðist forvitinn um hvað væri vafið utan um dýrið. Halldór var samt sem áður einkar kjánalegur á þessari afhendingu og hélt áfram að reyna fyrir sér sem uppistandari í stað þess að vera virðulegur forsætisráðherra, hef samt sem áður fulla trú á því að hann er góður maður. Allavega, þá fékk þessi unga stelpa eina milljón fyrir þessa viðskiptahugmynd en alls bárust 30 slíkar í þessa samkeppni. Hátísku klæðnaður fyrir hunda ! Come on ! Hinsvegar, ef við horfum rökrétt á málið, þá gæti vel verið grundvöllur fyrir svona vöru hjá ríku fólki sem klæðir hundana sína í föt. Því hvað eru dýraföt annað en lúxusvara sem aðeins þeir efnameiru geta leyft sér og hvers vegna þá að fara ekki alla leið og gera hátískuföt fyrir þetta fólk. Markmið keppninnar, Nýsköpun 2005, er að stuðla að aukinni nýsköpun og frumkvæði í íslensku samfélagi. Þarna er vissulega á ferðinni frumkvæði, en nýsköpunin er af skornum skammti. Aftur á móti þá kom það fram þegar var verið að kynna sigurvegarann að þau hafa nú þegar hafið sölu á fatnaðnum víðsvegar um Evrópu: "Fyrirtækið hefur nú þegar hafið markaðssetningu og sölu á Norðurlöndunum, Bretlandi, Bandaríkjunum,Kanada,Ítalíu, Spáni og Hollandi". Nú hef ég leitað vítt og breitt um internetið og það eina sem ég finn um Theo-Fashion eða Theo-dog fashion er eftirfarandi:

Þetta ritaði Theo - Fashion
Svo Mr. Theodoulos Georgiou

Þannig að það virðist ekki vera neitt í þeim staðhæfingum að fyrirtækið hafi nú þegar hafið sölu á fatnaði sínum erlendis, þetta er hátískuvara fyrir dýr og til þess að koma henni á framfæri þarftu að hafa uppi öfluga heimasíðu til þess að breiða út boðskap vörunnar. Það er ekki nóg að mæta með hundinn þinn í kjól frá spakmannsspjörum og ætlast til þess að fá milljón kall til þess að selja svona fatnað fyrir hunda. Eða hvað !! Í kvöldmat vorum við með reykta ýsu með sykurbaunum og rækjum. Fínn réttur í fiskborði Nóatúns.

Önnur verðlaun í Nýsköpun 2005 eru hálf milljón króna. Þau komu að þessu sinni í hlut Eyþórs Kristjánssonar sem hefur þróað nýjar aðferðir til að greina og meðhöndla hreyfistjórn hálshryggjar hjá sjúklingum með einkenni um hálshnykk (tognun) eftir umferðaslys. Sérhannaður vélbúnaður og hugbúnaður gerir það kleift í fyrsta skiptið á alþjóðavísu að meðhöndla sjúklinga fyrir framan tölvu sem verður í samskiptum við hugbúnaðarforrit á Veraldarvefnum.

Maður spyr sig, hvers vegna í ósköpunum var þessi uppgötvun ekki í fyrsta sæti !